វគ្គបណ្តុះបណ្តាលនិស្សិត ស្តីពីការបង្រៀនប្រវត្តិសាស្រ្តកម្ពុជាប្រជាធិបតេយ្យ (១៩៧៥-៧៩) នៅ វិចិត្រសាលសិល្ប:សហសម័យវិទ្យាស្ថានស្លឹករឹត ក្នុងបរិវេណវិទ្យាស្ថានជាតិអប់រំ
ថ្ងៃទី ៣ ខែ មករា ឆ្នាំ ២០១៨
នៅថ្ងៃទី២ ខែមករា ឆ្នាំ២០១៨ មជ្ឈមណ្ឌលឯកសារកម្ពុជា សហការជាមួយ ក្រសួង អប់រំ យុវជន និងកីឡា រៀបចំវគ្គបណ្តុះបណ្តាលនិស្សិត ដើម្បីបង្កើតប្រសិទ្ធភាព និរន្តរ ភាព និងបង្កើនសមត្ថភាពក្នុងការបង្រៀនប្រវត្តិសាស្រ្តកម្ពុជាប្រជាធិបតេយ្យ (1975-79) តាមរយៈការប្រើប្រាស់វិធីសាស្រ្តបង្រៀនដ៏សម្បូរណ៍បែប នៅសាលសហសម័យវិទ្យាស្ថានស្លឹករឹត ស្ថិតក្នុងបរិវេណវិទ្យាស្ថានជាតិអប់រំ។ វគ្គបណ្តុះបណ្តាលនេះ នឹងផ្តល់នូវវិធីសាស្រ្តថ្មីមួយ ដោយបង្កើតឲ្យមានការសន្ទនាពីបទពិសោធន៍ផ្ទាល់ខ្លួន និងរឿងរ៉ាវរបស់ដើមបណ្តឹងរដ្ឋប្បវេណី និងអ្នករស់រានមានជីវិតពីរបបកម្ពុជាប្រជាធិបតេយ្យ ដែលនឹងត្រូវបានអញ្ជើញឲ្យចូលរួមធ្វើជាវាគ្មិននៅក្នុងថ្នាក់រៀន។
វគ្គបណ្តុះបណ្តាលនេះមានរយៈពេលពីរខែ ដោយសិស្សទទួលការបណ្តុះបណ្តាលរយៈពេលមួយម៉ោងក្នុងមួយថ្ងៃ ដែលនឹងផ្តោតសំខាន់ទៅលើការអភិវឌ្ឍចំណេះដឹងផ្នែកប្រវត្តិសាស្រ្ត ក៏ដូចជាការជួយដល់សមត្ថភាពរបស់គ្រូបង្រៀនក្នុងការប្រើប្រាស់វិធីសាស្រ្តសិស្សមជ្ឈមណ្ឌល។ វគ្គបណ្តុះបណ្តាលនេះ នឹងផ្តល់នូវការធ្វើបទបង្ហាញពីប្រវត្តិសាស្រ្តកម្ពុជាប្រជាធិបតេយ្យ (១៩៧៥-១៩៧៩) និងវិធីសាស្រ្តទំនើប ព្រមទាំងការពិភាក្សាជាក្រុម និងការអនុវត្តលំហាត់ ដែលបង្ហាញឲ្យឃើញចំណេះដឹងរបស់គរុនិស្សិត បន្ទាប់ពីបានសិក្សាជំពូកនីមួយៗនៅក្នុងសៀវភៅប្រវត្តិសាស្រ្តកម្ពុជាប្រជាធិបតេយ្យ (១៩៧៥-៧៩) និង «សៀវភៅណែនាំសម្រាប់គ្រូបង្រៀន»។
គោលបំណងរបស់វគ្គបណ្តុះបណ្តាល គឺ ៖ ១) អភិវឌ្ឈចំណេះដឹងរបស់គរុសិស្ស-និស្សិត ពីប្រវត្តិសាស្រ្តកម្ពុជាប្រជាធិបតេយ្យ ក៏ដូចជាជួយដល់សមត្ថភាពបង្រៀនរបស់ខ្លួនក្នុងការប្រើប្រាស់វិធីសាស្រ្តសិស្សមជ្ឈមណ្ឌល។ ២) ប្រើប្រាស់រឿងរ៉ាវ និងបទពិសោធន៍របស់ដើមបណ្តឹងរដ្ឋប្បវេណី និងអ្នកដែលនៅរស់រានមានជីវិតពីរបបខ្មែរក្រហមក្នុងការបង្រៀន និងផ្តល់នូវមធ្យោបាយសម្រាប់ការពិភាក្សាពីរឿងរ៉ាវជីវិតផ្ទាល់ខ្លួនក្នុងរបបកម្ពុជាប្រជាធិបតេយ្យរបស់វាគ្មិនក្នុងចំណោមសិស្ស។ ៣) លើកកម្ពស់ប្រសិទ្ធភាព និងនិរន្តរភាពនៃកម្មវិធីអប់រំពីអំពើប្រល័យពូជសាសន៍ តាមរយៈសិក្ខាសាលាស្តីពីការអភិវឌ្ឍន៍វិជ្ជាជីវៈ ការបោះពុម្ព និងចែកចាយសៀវប្រវត្តិសាស្រ្តកម្ពុជាប្រជាធិបតេយ្យរបស់មជ្ឈមណ្ឌលឯកសារកម្ពុជា។
មុននឹងចាប់ផ្តើមកម្មវិធីបណ្តុះបណ្តាល លោក ផេង ពង្សរ៉ាស៊ី នាយកកម្មវិធីអប់រំពីអំពើប្រល័យពូជសាសន៍នៅកម្ពុជា បានសំណេះសំណាលជាមួយនិស្សិត ព្រមទាំងបានចែកសៀវភៅប្រវត្តិសាស្រ្តកម្ពុជាប្រជាធិបតេយ្យ (១៩៧៥-១៩៧៩) និងចែកកម្រងសំណួរដើម្បីវាស់ស្ទង់ចំណេះដឹងរបស់គរុនិស្សិត អំពីប្រវត្តិសាស្រ្តកម្ពុជាប្រជាធិបតេយ្យ ដែលមានចំនួនសរុប២០សំណួរ ទាក់ទងនឹងការវាយតម្លៃលើមាតិកាប្រវត្តិសាស្រ្ត និងវិធីសាស្រ្តបង្រៀនមុនពេលបណ្តុះបណ្តាល។ បន្ទាប់ពីបានចូលរួមវគ្គបណ្តុះបណ្តាលនេះ និស្សិត នឹងទទួលបាននូវចំណេះដឹងអំពីប្រវត្តិសាស្រ្តកម្ពុជាប្រជាធិបតេយ្យកាន់តែច្បាស់ឡើង។
នៅក្នុងវគ្គបណ្តុះបណ្តាលនេះ និស្សិតមួយចំនួនបានបញ្ចេញនូវចំណាប់អារម្មណ៍ ដូចខាងក្រោម៖
មី បូរី និស្សិតឆ្នាំទី២ ផ្នែកប្រវត្តិវិទ្យា នៅសាកលវិទ្យាល័យភូមិន្ទភ្នំពេញ បានរៀបរាប់ថា ដំបូងឡើយគាត់ធ្លាប់បានឮអំពីរបបកម្ពុជាប្រជាធិបតេយ្យតាមរយៈឪពុកម្តាយ និងចាស់ទុំដែលរស់នៅក្បែរគ្នា ប៉ុន្តែកាលណោះ គាត់មិនសូវចាប់អារម្មណ៍ពីរបបនេះឡើយ ដោយគាត់យល់ថា សម័យកាលនោះ គួរឲ្យខ្លាច និងអាក្រក់យ៉ាងខ្លាំង។ ប៉ុន្តែនៅពេលដែលគាត់បានសិក្សានៅថ្នាក់អនុវិទ្យាល័យទាក់ទងមេរៀនអំពីសម័យខ្មែរក្រហម ទើបគាត់ចាប់ផ្តើមមានចំណាប់អារម្មណ៍អំពីប្រវត្តិសាស្រ្តរបស់ខ្លួន ជាពិសេសប្រវត្តិសាស្រ្តកម្ពុជាប្រជាធិបតេយ្យ។ បូរី បន្តថា គាត់មានឱកាសចូលរួមវគ្គបណ្តុះបណ្តាលនៅថ្ងៃនេះ នឹងធ្វើឲ្យគាត់ទទួលបានចំណេះដឹងទាក់ទងនឹងរបប និងវិធីសាស្រ្តកាន់តែច្បាស់លាស់ ហើយគាត់នឹងចែករំលែកចំណេះដឹងទាំងអស់នេះ ទៅកាន់មិត្តភក្តិរបស់គាត់។ គាត់នឹងយកចំណេះដឹងទាំងនេះទៅពិភាក្សាជាមួយឪពុកម្តាយរបស់គាត់ ព្រោះឪពុករបស់គាត់ចូលចិត្តប្រវត្តិសាស្រ្ត និងធ្លាប់បានឆ្លងកាត់សម័យខ្មែរក្រហម។ បូរី ចង់ដឹងថាឪពុករបស់គាត់ធ្លាប់ឆ្លងកាត់រឿងរ៉ាវអ្វីខ្លះ ហើយដូចទៅនឹងការសិក្សារបស់គាត់ដែររឺទេ ដើម្បីការប្រៀបធៀប។
កែន ជ្រា និស្សិតឆ្នាំទី៣ ផ្នែកប្រវត្តិវិទ្យា នៅសាកលវិទ្យាល័យភូមិន្ទភ្នំពេញ បានរៀបរាប់ថា ការរៀនប្រវត្តិសាស្រ្តកម្ពុជាប្រជាធិបតេយ្យ វាពិតជាមានសារសំខាន់ខ្លាំងណាស់ ជាពិសេសសម្រាប់អ្នកសិក្សាស្រាវជ្រាវ។ ជ្រា បានបន្តថា ចំពោះប្រវត្តិសាស្រ្តកម្ពុជាប្រជាធិបតេយ្យ គឺជាប្រវត្តិសាស្រ្តដ៏ព្រៃផ្សៃ សម្រាប់ប្រជាជនខ្មែរទូទៅត្រូវយល់ដឹង ជាពិសេសសិស្ស-និស្សិត និងក្មេងជំនាន់ដើម្បីជៀសវាងកុំឲ្យប្រវត្តិសាស្ត្រនេះកើតឡើងម្តងទៀត។ ជ្រា ធ្លាប់បានសិក្សាអំពីប្រវត្តិសាស្រ្តកម្ពុជាប្រជាធិបតេយ្យតាមរយៈកម្មវិធីក្រសួងអប់រំដែរ ប៉ុន្តែគាត់នៅយល់ដឹងតួចនៅឡើយអំពីប្រវត្តិសាស្រ្តនេះ។ ជ្រា រំពឹងថា ចាប់ពីថ្ងៃនេះទៅ គាត់នឹងទទួលបានចំណេះដឹងកាន់តែច្រើនពីវគ្គបណ្តុះបណ្តាល។
ហូ ថុនា បុគ្គលិកមជ្ឈមណ្ឌលឯកសារកម្ពុជា