មាតិកា

សិក្ខាសាលាអន្តរជាតិស្តីពីការពង្រឹងសមត្ថភាពការអប់រំ អំពីប្រវត្តិសាស្ត្រ និងការទប់ស្កាត់អំពើហិង្សា

ថ្ងៃទី ១៥ ខែ មករា ឆ្នាំ ២០១៨


ប្រភព៖ បណ្ណសារមជ្ឈមណ្ឌលឯកសារកម្ពុជា

សិក្ខា​សាលាអន្តរជាតិ ស្តីពីការពង្រឹងសមត្ថភាពការអប់រំអំពីប្រវត្តិ​សាស្ត្រ និងការ​ទប់ស្កាត់អំពើហិង្សា ត្រូវបានរៀបចំឡើង ដោយអង្គការសម្ព័ន្ធអន្តរជាតិបណ្តុះមនសិការ (Sites of Conscience) នៅវិចិត្រសាលសិល្ប:សហសម័យវិទ្យាស្ថានស្លឹករឹត ក្នុងបរិវេណ​វិទ្យាស្ថានជាតិអប់រំ។​​ កម្មវិធីសិក្ខា​សាលា​អន្តរជាតិ​នេះ នឹងធ្វើឡើងរយៈ​ពេលបួនថ្ងៃ ចាប់​ ពីថ្ងៃទី១៥ ដល់ ថ្ងៃទី១៨ ខែមករា ឆ្នាំ២០១៨ ដែលមានសមាជិក និងអង្គការជាដៃគូមកពី​ប្រទេស​​ទីម័រខាងកើត ​ហ្គាតាម៉ាឡា ប្រទេសឥណ្ឌូនេស៊ី និងប្រទេសកម្ពុជា។ លោក​ជំទាវ ទន់ សាអ៊ីម អនុរដ្ឋលេខាធិការក្រសួង​អប់រំ យុវជន និងកីឡា តំណាង​ក្រសួងអប់រំ យុវជន និងកីឡា នៃព្រះរាជណាចក្រកម្ពុជា ដែលបានធ្វើ​ការងារ​លើគម្រោង​អប់រំស្តីពីអំពើប្រល័យ​ពូជសាសន៍នៅកម្ពុជា ក៏បានចូលរួម និងធ្វើគណអធិបតី​ក្នុងពិធី​បើក​វគ្គសិក្ខា​សាលាអន្តរ​ជាតិនេះ ព្រមទាំងមានគ្រូប្រវត្តិ​សាស្រ្ត​ថ្នាក់ជាតិ គរុនិស្សិត​​មកពី​វិទ្យា​​ស្ថាន​ជាតិអប់រំ និង​សមាជិកមកពីអង្គការជាដៃគូ ។

ប្រភព៖ បណ្ណសារមជ្ឈមណ្ឌលឯកសារកម្ពុជា

សារ៉ា ប្រេដស អ្នកសម្របសម្រួល​ មកពីអង្គការសម្ព័ន្ធអន្តរជាតិបណ្តុះមនសិការ (Sites of Conscience) បានឡើងបង្ហាញពីគោលបំណងរបស់សិក្ខា​សាលាអន្តរជាតិ ស្តីពីការពង្រឹងសមត្ថភាពការអប់រំអំពីប្រវត្តិ​សាស្ត្រ និងការ​ទប់ស្កាត់អំពើហិង្សាថា៖ អង្គការ​សម្ព័ន្ធអន្តរជាតិបណ្តុះមនសិការ (Sites of Conscience) ជាអង្គការសម្ព័ន្ធអន្តរជាតិ​មួយដែលធ្វើការទាក់​ទងជាមួយនឹងប្រទេសក្រោយជម្លោះ ដើម្បីផ្លាស់ប្តូរឲ្យទៅជាសង្គម​មួយដែលមានការអប់រំ និងការដោះស្រាយជាមួយនឹងអតីតកាល លើសពីនេះទៀតសោត វាជាអង្គការសម្ព័ន្ធ​ថ្នាក់​ពិភពលោក​មួយ​ដែលធ្វើឲ្យមានការចងចាំ ចំពោះប្រទេសដែល​ប្រឈមនឹងប្រវត្តិសាស្រ្តដ៏ជូចត់។ អង្គការសម្ព័ន្ធអន្តរជាតិនេះ ក៏បានធ្វើការនៅប្រទេស​កម្ពុជា​អស់រយៈពេល​ជាច្រើនឆ្នាំមកហើយទាក់ទងជាមួយនឹងប្រវត្តិសាស្រ្តដ៏ជូរ​ចត់នេះ។ ថ្ងៃនេះ ក៏មិនខុសពីពេលមុនដែរ​ យើងបង្កើតសិក្ខាសាលាអន្តរជាតិនៅទីនេះ ក្នុងគោល​បំណងស្វែងរកការពិត និងយុត្តិ​ធម៌អន្តរកាល។ ក្នុងរយៈពេលបីឆ្នាំ ​សម្ព័ន្ធអង្គការអន្តរជាតិ យើងបានធ្វើការជាមួយនឹងប្រទេសចំនួន១៧ និងអង្គ​ការសង្គមស៊ីវិលចំនួន២៥០ ក្នុង​ចំណោម​៥៥ប្រទេស ហើយមជ្ឈម​ណ្ឌលឯកសារកម្ពុជា គឺជាសមាជិកទី៩នៃសម្ព័ន្ធអន្តរ​ជាតិ។

ប្រភព៖ បណ្ណសារមជ្ឈមណ្ឌលឯកសារកម្ពុជា

ក្នុងឱកាសចូលរួមបើកសិក្ខា​សាលាអន្តរជាតិ ស្តីពីការពង្រឹងសមត្ថភាពការអប់រំអំពី​ប្រវត្តិ​សាស្ត្រ និងការ​ទប់ស្កាត់អំពើហិង្សា លោកជំទាវ​ ទន់​ សាអ៊ីម បាន​សម្តែងនូវ​អារម្មណ៍​រីករាយ​ ដែលសិក្ខាសាលានេះបានធ្វើឡើងនៅប្រទេសកម្ពុជា និងថ្លែងអំណរ​គុណយ៉ាង​ជ្រាល​ជ្រៅ ចំពោះកិច្ចសហការដ៏ល្អ រវាងក្រសួងអប់រំ យុវជន និងកីឡា ជាមួយ​អង្គការជាដៃគូដែលធ្វើការលើការអប់រំពីប្រវត្តិសាស្រ្ត ហើយទទួលបាននូវភាពជោគជ័យ​គួរ​ឲ្យកត់សំគាល់។ ការបង្រៀន​ប្រវត្តិសាស្រ្តកម្ពុជា​ប្រជា​ធិបតេយ្យ បានផ្តល់នូវព័ត៌មាន និង​បទពិសោធន៍ដល់ក្មេងជំនាន់​ក្រោយឲ្យដឹងពីរបបនេះ ដែលបានប្រព្រឹត្តមកលើប្រជា​ជន។ ប្រជាជនកម្ពុជាជាច្រើន​បាន​ឆ្លងកាត់ជីវិតរស់នៅយ៉ាងលំបាក និងបានបាត់បង់នូវ​សិទ្ធិសេរីភាព។ លោក​​ជំទាវបានបន្តថា ប្រទេសកម្ពុជាបានធ្លាក់ទៅក្នុងគ្រោះ​មហន្តរាយ​ទាំង​ស្រុងក្នុងរបបនេះ ហើយក្រសួង​អប់រំ​ យុវជន និងកីឡា បានខិតខំបញ្ជ្រៀតកម្មវិធី​សិក្សា​ និងមេរៀនទាក់ទងរបបកម្ពុជាប្រជា​ធិបតេយ្យ ទៅតាមថ្នាក់អនុវិទ្យាល័យ និងវិទ្យា​ល័យ​នៅទូទាំងប្រទេស។ លោកជំទាវ ដែលជាជនរងគ្រោះក្នុងរបបនេះផ្ទាល់បានលើក​ឡើងថា អតីតកាលគឺជាមេរៀនសម្រាប់ជីវិតរបស់យើងនៅក្នុងបច្ចុប្បន្ននេះ យើង​រៀន​អំពី​អតីតកាលដើម្បីរក្សាការការពារកុំឲ្យប្រវត្តិសាស្រ្តដ៏សាហាវនេះកើត​ឡើង​ម្តង​​ទៀត។ យើង​​ត្រូវបណ្តុះបណ្តាលយុវជនឲ្យក្លាយទៅជាទំពាំងស្នងឬស្សី។ យើងកំពុងខិតខំ​ប្រឹងប្រែង​ធ្វើ​សព្វថ្ងៃនេះដើម្បីឆ្ពោះទៅរកការលើកកំពស់​សីលធម៌ និងស្វែងរក​យុត្តិ​ធម៌ទៅដល់ជនរង​គ្រោះ និងឈានទៅដល់ការផ្សះផ្សាជាតិ។ លោកជំទាវ ក៏បានថ្លែងអំណរគុណដល់​តំណាង​សមាជិកដែលមកពីប្រទេសទាំងបួន ដែលនឹងចែករំលែកអំពីប្រវត្តិសាស្រ្តរបស់​ប្រទេសនីមួយៗ និងជូនពរ​ដល់​គណៈអធិបតី ភ្ញៀវជាតិអន្តរជាតិ លោកគ្រូអ្នកគ្រូ និងគរុ​និស្សិត​ដែលបានអញ្ជើញចូលរួម​នៅថ្ងៃនេះ និងបាន​ប្រកាស​បើកវគ្គ​សិក្ខា​សាលាអន្តរជាតិ​នេះ​ដូចតទៅ។

ប្រភព៖ បណ្ណសារមជ្ឈមណ្ឌលឯកសារកម្ពុជា

បន្ទាប់ពី​ ការបើកកម្មវិធី អង្គសិក្ខាសាលា បានចាប់ផ្តើមបើកម្មវិធីពិភាក្សាដោយមាន​ការចូលរួមពីតំណាងអង្គការ និងស្ថាប័នមកពីប្រទេសទីម័រ ប្រទេសហ្គាតាម៉ាឡា និង​ប្រទេសកម្ពុជា។ កម្មវិធីពិភាក្សានេះ បានបើកឱកាសឲ្យវាគ្មិនតំណាងឲ្យអង្គការ​មកពី​ប្រទេសនីមួយៗបង្កើតជាសំណួរទាក់ទងនឹង សិក្ខាសាលាស្តីពីការពង្រឹងការអប់រំស្តីពី​ប្រវត្តិសាស្រ្ត និងការទប់ស្កាត់អំពើហិង្សា។​ ជាមួយគ្នានេះ តំណាងមកពីប្រទេសនីមួយៗ​ក៏បាន​លើកឡើងពីគម្រោងសំខាន់ដែលខ្លួនបានធ្វើកន្លងមក និងអ្វីដែលខ្លួនចង់បាន បន្ទាប់ពី​សិក្ខាសាលា​នេះ ដូចជាការបង្កើតឲ្យមានសារមន្ទីរ ការបង្រៀបប្រវត្តិសាស្រ្ត ដោយឡែក អនុប្រធានការិយាល័យអប់រំស្រុកស្រីសន្ធរ តំណាងមកពីប្រទេសកម្ពុជា ចង់​បង្កើតឲ្យមាន​បណ្ណាល័យនៅតាមសាលា ដើម្បីឲ្យសិស្សានុសិស្សចូលអាន។

ប្រភព៖ បណ្ណសារមជ្ឈមណ្ឌលឯកសារកម្ពុជា

នៅពេលរសៀលថ្ងៃដដែល តំណាងអង្គការមូលនិធិកោសល្យវិច័យ មកពីប្រទេស​ហ្គាតាម៉ាឡា បានធ្វើបទបង្ហាញស្តីពីកិច្ចការងារស្រាវជ្រាវ និងស៊ើបអង្កេត និងការធ្វើ កោសល្យវិច័យ (DNA) ទាក់ទងនឹងការ​បាត់ខ្លួន និងការស្លាប់របស់ជនរងគ្រោះនៅក្នុង​ប្រតិបត្តិការយោធាក្នុងប្រទេសនេះ។

ប្រភព៖ បណ្ណសារមជ្ឈមណ្ឌលឯកសារកម្ពុជា

តំណាងមកពីប្រទេសទីម័រ ក៏ចែករំលែកពីបទពិសោធន៍នៃការបង្រៀន​ប្រវត្តិសាស្រ្ត និងការចងចាំ នៅតាមសាកលវិទ្យាល័យ និងនៅថ្នាក់មូលដ្ឋាន។ ការអប់រំទាំងនេះនឹងផ្តោ​ត​សំខាន់​ទៅលើសន្តិភាព​ និងការផ្សះផ្សាជាតិក្នុងប្រទេស។

ប្រភព៖ បណ្ណសារមជ្ឈមណ្ឌលឯកសារកម្ពុជា

លោកគ្រូ ស៊ីវ ធួន តំណាងឲ្យប្រទេសកម្ពុជាបានចែករំលែកបទពិសោធន៍មួយចំនួន ដល់សិក្ខាសាលាអន្តរជាតិ ដោយបានយករឿងរ៉ាវ និងសោកនាដ្ឋកម្មផ្សេងៗ  ចាប់តាំង​ពីខ្មែរ​ក្រហមបានចូលកាន់កាប់អំណាច រហូតដល់ថ្ងៃរបបខ្មែរក្រហមត្រូវបានដួលរលំនៅ​ថ្ងៃទី៧​ មករា ១៩៧៩។

ប្រភព៖ បណ្ណសារមជ្ឈមណ្ឌលឯកសារកម្ពុជា

សិក្ខាសាលាអន្តរជាតិនេះ ត្រូវបានបញ្ចប់នៅម៉ោង៥កន្លះល្ងាច និងបន្តទៅថ្ងៃស្អែក​តាម​កម្មវិធីដែល​បានគ្រោងទុក។

ហូ ថុនា បុគ្គលិកមជ្ឈមណ្ឌលឯកសារកម្ពុជា